O circo dos valentes

 

"Os alumnos de Educación Infantil e 1º de Primaria visitaron o Auditorio de Galicia para disfrutar de «Parade, o circo dos valentes», un espectáculo cheo de humor, maxia, ternura e valores sobre o respecto aos animais. A obra, acompañada pola Real Filharmonía de Galicia e con música de Stravinsky, Satie e Poulenc, contou a historia dun elefante chamado Babar que superaba o seu medo á pista."

 

8 de Marzo

 Como celebración do 8m, nestes días, quixemos dar visibilidade ás mulleres que nos abren camiños, as nosas "supermulleres". Ao mesmo tempo, pretendemos seguir avanzando no obxectivo do noso proxecto anual poñendo en valor a cultura e a lingua galega. Para iso,  nesta ocasión decidimos contar coa colaboración dunha experta regueifeira Lupe Blanco, que nos impartiu un maravilloso taller de regueifas en conxunto cos compañeiros/as do CEIP Sobrado Nebra.
Ademais, no ámbito das aulas, os nenos e as nenas de primaria escribiron cartas de agradecemento ás súas "supermulleres", aquelas que máis admiran e que inspiran o seu día a día.

 

Entroido 2025

 

No CEIP Portosín celebramos o Entroido mergullados na temática das lendas galegas e o Camiño de Santiago, dentro do Proxecto de Centro deste ano. Ao longo da semana seguimos con entusiasmo os mandadiños do Meco, e o venres puxemos o broche final cun desfile no que bolboretas do camiño, meigas, trasnos, lavandeiras, lobisomes, a Santa Compaña e peregrinos encheron o pobo de cor e ledicia. 

Xa no colexio, o alumnado de segundo e terceiro ciclo de primaria deleitounos cunha divertida regueifa, antes de repoñer forzas cunha merenda especial preparada polos nosos grandes filloeiros. Queremos agradecer de corazón o seu inestimable traballo, así como a colaboración das familias e o acompañamento da Escola Infantil e de toda a comunidade educativa por facer posible este Entroido tan galego!