V FEIRÓN MARIÑEIRO

 O día 12 de xuño toda a comunidade educativa desfrutamos dunha nova edición, a quinta xa, do Feirón Mariñeiro, a festa de fin de curso do noso centro. Nela unificamos:

• Unha mostra do traballo realizado ao longo de todo o curso polo alumnado, o profesorado, as familias,... no proxecto documental integrado deste curso "A nosa lingua fai camiño".
• Actuacións musicais e de danza.
• Comida campestre con sardiñada a cargo das familias e coa colaboración da Confraría de pescadores de Portosín.
• Xogos populares, inchables, festa da auga e da escuma,...

Unha xornada coa que coidamos a nosa identidade coma fillas e fillos dunha vila mariñeira.

MAIO DE TEATRO

Os “Venres de Teatro” deixáronnos momentos inesquecibles ao longo do mes de maio.

Compartimos un vídeo resumo de todas as actuacións que o noso alumnado preparou con moitísimo agarimo. Tivemos a oportunidade de desfrutar de diferentes obras de teatro e de actuacións musicais que contribuíron a poñer en valor o uso do galego como lingua viva e esencial para a nosa identidade cultural.

A través desta actividade, programada dentro do noso PDI anual "Viaxamos coa lingua a través da historia", o noso alumnado abordou temas como o da emigración, as tradicións e os costumes da nosa terra, a historia e a evolución da lingua galega,...a inclusión, a empatía e a tolerancia.

Queremos felicitar a todo o alumnado polo traballo realizado e a implicación do profesorado, das familias e de toda a comunidade educativa que sempre está a colaborar co centro.

Agradecemos tamén á Asociación de Empresarios de Portosín que colaborou con nós aportando diferentes produtos para sortear entre os asistentes.

 

OS MAIOS

Coa chegada do novo mes xuntámonos para darlle a benvida participando no concurso do noso concello, cun maio "dos de toda a vida".

Quedounos ben chulo!

DEPORTE POLA LECTURA

No CEIP Portosín seguimos celebrando o Día do Libro coa nosa tradicional Carreira pola Lectura, que este ano chegou á súa décimo sétima edición!
Foi unha xornada chea de participación, onde unimos lectura e deporte acompañados, como vén sendo habitual, polos compañeiros e compañeiras da Escola Infantil de O Parque e do CEIP Sobrado-Nebra. Ademais, nesta edición innovamos cunha carreira de orientación para o alumnado de primaria, engadindo novos retos e aprendizaxes á experiencia.
Queremos agradecerlle especialmente ao alumnado do ciclo medio de deportes do IES de Porto do Son pola súa participación, así como ao Concello pola súa colaboración coa achega de auga e merendas.
Grazas tamén a todas as familias polo apoio constante. Actividades coma esta axudan a fomentar hábitos saudables e o gusto pola lectura desde as primeiras etapas.
Parabéns a todos e todas as participantes! Vémonos na seguinte!

Obradoiro - Un mar de cambios

 O mar regula o clima do planeta… e tamén precisa que o coidemos.

Xunto coa Cooperativa 13º realizamos un obradoiro de educación ambiental sobre o cambio climático e a conservación do medio mariño a través de:

dinámicas participativas

gafas de realidade virtual para ver o fondo mariño

e un obradoiro de ilustracións en acuarela de especies en perigo de extinción.

Aprender para comprender. Comprender para actuar!

Alumnado de 4º, 5º e 6º de primaria do CEIPP de Portosín

8 M - DÍA DA MULLER

Un ano máis conmemoramos o 8 de marzo, Día da Muller, co obxectivo de poñer en valor a loita polos dereitos das mulleres e a importancia de seguir avanzando cara a unha sociedade máis xusta e igualitaria.

O alumnado presentou unha actividade moi especial na que se escoitaron os consellos que diferentes xeracións de mulleres darían ás nenas. A través das súas voces puidemos coñecer experiencias, dificultades e aprendizaxes de cada época, reflexionando sobre todo o camiño percorrido e sobre o que aínda queda por avanzar.

Unha xornada para aprender do pasado, comprender o presente e seguir construíndo un futuro con máis igualdade.

DÍA DE ROSALÍA

O 23 de febreiro celebramos o Día de Rosalía de Castro, unha das figuras máis emblemáticas do rexurdimento da nosa lingua e literatura e símbolo da cultura galega en xeral.

Outro ano máis, no noso centro educativo realizamos un acto conmemorativo para renderlle homenaxe. Nesta xornada, o alumnado presentou diferentes actividades relacionadas coa súa vida e obra. Expúxose a súa biografía, a súa traxectoria como escritora e a importancia que tivo na defensa da lingua e identidade galegas.

Ademais, algúns alumnos e alumnas recitaron poemas da autora, enchendo o centro de emoción e orgullo pola nosa terra.

ENTROIDO 2026

Ao longo desta semana tan especial, os nosos nenos e nenas foron cumprindo con ilusión os mandadiños do Meco, enchendo as aulas de cor, creatividade e moito humor con diferentes disfraces e accesorios cada día.

Para poñer o broche final, cada aula mergullouse nun momento distinto da historia, ofrecéndonos un desfile cheo de imaxinación e alegría.

A xornada rematou cunha pequena festa e unha deliciosa degustación de filloas, compartindo sorrisos e bos momentos en comunidade.

Queremos agradecer sinceramente á ANPA do centro, ao Concello, á Asociación de Empresarios de Portosín, ás familias e, por suposto, a todas as persoas que, coa súa colaboración, fixeron posible que este día fose todo un éxito.

XUNTOS NA LOITA CONTRA O CANCRO INFANTIL

No CEIP Plurilingüe de Portosín sumámonos un curso máis ao Día da loita Contra o Cancro Infantil (o día 15 de febreiro) da man de ASANOG (Asociación de Axuda a Nenos Oncolóxicos de Galicia), colaborando nesta iniciativa solidaria para dar visibilidade, apoio e esperanza a todas as familias que conviven con esta realidade.

Durante a semana do entroido tratamos de enviarlles moita forza e ánimo aos nenos e nenas que loitan cada día contra esta enfermidade.

DÍA ESCOLAR DA PAZ E A NON VIOLENCIA

Un ano máis polo 30 de xaneiro, no noso centro conmemoramos o Día da Paz. Durante o acto, o alumnado presentou os símbolos da paz que elaboraron nas aulas os días previos, empregando elementos cheos de significado como as follas de carballo, as pombas e a coroa de loureiro, acompañados de poemas cos que reivindicaron a necesidade de construír un mundo máis xusto. Toda esta simboloxía relaciónase co noso PDI anual "A nosa lingua fai camiño a través da historia" co que estamos a facer un percorrido pola historia e os seus períodos máis importantes: perehistoria, imperio romano, época medieval...viaxe que facemos empregando a lingua galega.

O alumnado de 6º de primaria fixo a lectura dun manifesto pola paz co que explicaron brevemente a orixe da conmemoración e a súa motivación. Completaron este discurso as nenas e nenos de 5º de primaria facendo un percorrido pola realidade actual do mundo e aos conflitos bélicos que seguen activos a día de hoxe e ás terribles consecuencias que estes teñen para as persoas que os sofren. Algo que sen dúbida nos fixo reflexionar a todos/as os/as presentes.
Rematamos o acto cantando unha canción elaborada para a ocasión e que levaba o título de "Vou construir", cunha letra sacada dun poema de Miguel A. Alonso Diz.