8 M - DÍA DA MULLER

Un ano máis conmemoramos o 8 de marzo, Día da Muller, co obxectivo de poñer en valor a loita polos dereitos das mulleres e a importancia de seguir avanzando cara a unha sociedade máis xusta e igualitaria.

O alumnado presentou unha actividade moi especial na que se escoitaron os consellos que diferentes xeracións de mulleres darían ás nenas. A través das súas voces puidemos coñecer experiencias, dificultades e aprendizaxes de cada época, reflexionando sobre todo o camiño percorrido e sobre o que aínda queda por avanzar.

Unha xornada para aprender do pasado, comprender o presente e seguir construíndo un futuro con máis igualdade.

DÍA DE ROSALÍA

O 23 de febreiro celebramos o Día de Rosalía de Castro, unha das figuras máis emblemáticas do rexurdimento da nosa lingua e literatura e símbolo da cultura galega en xeral.

Outro ano máis, no noso centro educativo realizamos un acto conmemorativo para renderlle homenaxe. Nesta xornada, o alumnado presentou diferentes actividades relacionadas coa súa vida e obra. Expúxose a súa biografía, a súa traxectoria como escritora e a importancia que tivo na defensa da lingua e identidade galegas.

Ademais, algúns alumnos e alumnas recitaron poemas da autora, enchendo o centro de emoción e orgullo pola nosa terra.

ENTROIDO 2026

Ao longo desta semana tan especial, os nosos nenos e nenas foron cumprindo con ilusión os mandadiños do Meco, enchendo as aulas de cor, creatividade e moito humor con diferentes disfraces e accesorios cada día.

Para poñer o broche final, cada aula mergullouse nun momento distinto da historia, ofrecéndonos un desfile cheo de imaxinación e alegría.

A xornada rematou cunha pequena festa e unha deliciosa degustación de filloas, compartindo sorrisos e bos momentos en comunidade.

Queremos agradecer sinceramente á ANPA do centro, ao Concello, á Asociación de Empresarios de Portosín, ás familias e, por suposto, a todas as persoas que, coa súa colaboración, fixeron posible que este día fose todo un éxito.

XUNTOS NA LOITA CONTRA O CANCRO INFANTIL

No CEIP Plurilingüe de Portosín sumámonos un curso máis ao Día da loita Contra o Cancro Infantil (o día 15 de febreiro) da man de ASANOG (Asociación de Axuda a Nenos Oncolóxicos de Galicia), colaborando nesta iniciativa solidaria para dar visibilidade, apoio e esperanza a todas as familias que conviven con esta realidade.

Durante a semana do entroido tratamos de enviarlles moita forza e ánimo aos nenos e nenas que loitan cada día contra esta enfermidade.

DÍA ESCOLAR DA PAZ E A NON VIOLENCIA

Un ano máis polo 30 de xaneiro, no noso centro conmemoramos o Día da Paz. Durante o acto, o alumnado presentou os símbolos da paz que elaboraron nas aulas os días previos, empregando elementos cheos de significado como as follas de carballo, as pombas e a coroa de loureiro, acompañados de poemas cos que reivindicaron a necesidade de construír un mundo máis xusto. Toda esta simboloxía relaciónase co noso PDI anual "A nosa lingua fai camiño a través da historia" co que estamos a facer un percorrido pola historia e os seus períodos máis importantes: perehistoria, imperio romano, época medieval...viaxe que facemos empregando a lingua galega.

O alumnado de 6º de primaria fixo a lectura dun manifesto pola paz co que explicaron brevemente a orixe da conmemoración e a súa motivación. Completaron este discurso as nenas e nenos de 5º de primaria facendo un percorrido pola realidade actual do mundo e aos conflitos bélicos que seguen activos a día de hoxe e ás terribles consecuencias que estes teñen para as persoas que os sofren. Algo que sen dúbida nos fixo reflexionar a todos/as os/as presentes.
Rematamos o acto cantando unha canción elaborada para a ocasión e que levaba o título de "Vou construir", cunha letra sacada dun poema de Miguel A. Alonso Diz.

Debate literario

Esta semana o alumnado de 4° curso de primaria, levou a cabo na biblioteca do centro un modesto debate literario sobre "Bruxa e familia".

O debate puxo de manifiesto a diversidade de interpretacións que pode xerar unha mesma lectura, xa que cada neno e nena aportou o seu punto de vista persoal, enriquecendo a comprensión colectiva do libro. 

Ademais, fomentouse o pensamento crítico ao animalos a xustificar as súas opinións. A cativada participou con entusiasmo nesta actividade!

RECOMENDACIÓNS LECTORAS NADAL

 Un ano máis acercámosvos as recomendacións lectoras para este Nadal. Esperamos que as desfrutedes!

Dende o Equipo de biblioteca desexámosvos que teñades  un BO NADAL e que o 2026 veña cheo de ledicia.

APADRIÑAMENTOS LECTORES _DECEMBRO 2025

 Apadriñamentos deste mes de decembro na nosa biblioteca escolar.

"CASTELAO. MIRAR POR GALICIA"

O pasado venres o alumnado do 3° ciclo de primaria desprazouse á Cidade da Cultura en Compostela para visitar a exposición "Castelao. Mirar por Galicia", que ata a data é a experiencia de arte dixital máis avanzada en torno a unha das figuras máis destacadas da historia de Galicia.
A través da IA o alumnado achegóuse ao mundo Castelao dunha maneira tremendamente realista. Unha actividade incluída no noso PDI " Viaxamos coa lingua a través da historia".
Mereceu moito a pena!

25 NOVEMBRO

 Unímonos un ano máis para alzar a voz contra todas as formas de violencia machista. Ao longo da mañá, o alumnado participou en diversas actividades co obxectivo de concienciar, educar e honrar ás vítimas.

Carreira contra a violencia

Iniciamos a xornada cunha carreira simbólica organizada polo Concello de Porto do Son na que participou o alumnado do CEIP Santa Irene, CEIP Sobrado-Nebra, CEIP Campanario, EEI Carballosa e o CEIP Portosín. Unha actividade que nos permitiu correr xuntos/as por unha mesma causa: dicir NON á violencia de xénero.

Lectura do manifesto

O alumnado de 6º de Primaria foi o encargado de poñer voz ao noso compromiso colectivo a través da lectura dun manifesto, lembráronnos a importancia de educar en igualdade e respecto.

Paxariños violetas pola memoria.

Como acto final, colocamos un paxariño violeta por cada muller asasinada no que vai de ano. Un xesto sinxelo pero cargado de significado.

Dende o noso centro seguiremos traballando cada día para construír un espazo seguro e igualitario.